प्रगति राईको उपन्यास ‘बिर्सिएको मृत्यु’ सार्वजनिक

काठमाडौं – प्रगति राईको उपन्यास ‘बिर्सिएको मृत्यु’ शुक्रबार प्रज्ञा प्रतिष्ठानमा विमोचन गरियो । उपन्यासमाथि साहित्यकार विप्लव प्रतीक, विश्लेषक उज्ज्वल प्रसार्इं, कवि तथा पत्रकार संगीत श्रोताले टिप्पणी गरेका थिए ।

 

महिला दबाब समूहकी केन्द्रीय सचिव सावित्रा थापाको प्रमुख आतिथ्यमा सम्पन्न कार्यक्रममा उनले मूलबाटो प्रतिष्ठानले गरेको कार्यक्रममा सबैले ऐक्यबद्धता जनाउनुपर्ने धारणा राखिन् । महिला सशक्तीकरणका लागि यो राम्रो अभियान भएको उनको भनाइ छ ।

 

मूलबाटो प्रतिष्ठान नेपाल र इन्डिगो पब्लिकेसनले अन्तर्राष्ट्रिय श्रमिक महिला दिवसका अवसरमा आयोजना गरेको कविता वाचन र विचार गोष्ठीमा सो उपन्यास सार्वजनिक गरिएको हो । राईको यो दोस्रो आख्यानकृति हो ।

 

यसअघि उनको ‘लेखककी स्वास्नी’ नामक उपन्यास प्रकाशित भएको थियो । उनको कविता संग्रह ‘बादी विज्ञप्ति’ पनि प्रकाशित छ । कार्यक्रममा विक्रम परियार, प्रज्वल अधिकारी, निर्दोषी प्रवीणा, नमन राई, खेम बतास, केशव सिलवाल, शकुन्तला जोशी, यशोदा अधिकारी र चन्द्र रानाहँछाले कविता वाचन गरेका थिए ।

 

कार्यक्रममा छोरीको वंशाधिकारसम्बन्धी बहससमेत भएको थियो । मूलबाटो प्रतिष्ठानले फागुनलाई नारी महिना मानेर उत्सवका रूपमा मनाउने तयारी गरेको प्रतिष्ठानकी अध्यक्ष प्रगति राईले जानकारी दिइन् ।


आफ्नो प्रतिक्रिया दिनुहोस |

विचित्र संसार
© 2019: Hotpati All Rights Reserved.
Designed by: GOJI Solution
माथी