जापानमा शरणार्थी आवेदन दिने बढेपछि कडाई गरिने

टोकियो – जापानमा शरणार्थीका लागि आवेदन दिने विदेशीहरुको संख्यामा अत्याधिक वृद्धि भएको छ । यो वृद्धिसंगै जापान सरकारले यसमा कडाई गरी गम्भीर अनुसन्धानपश्चात मात्र शरणार्थीको मान्यता दिने बताएको छ ।

यही जनवरीदेखि सेप्टेम्बरसम्म मात्र सात हजार नौँ सय २६ जनाले शरणार्थीको आवेदन दिएका छन् । यो संख्या नौं महिनाको प्रारम्भिक आँकडा मात्र हो । र यो आँकडा विगत बर्षको तुलनामा धेरै रहेको जापान न्याय मन्त्रालयले शुक्रबार जारी गरेको विज्ञप्तीमा उल्लेख छ ।

मन्त्रालयले आफ्नो देश छोडि जापानमा आइ काम गर्न चाहानेहरुको संख्या धेरै भएकाले यो संख्यमा वृद्धि आएको हुनसक्ने अनुमान लगाएको छ । यति धेरै संख्यामा आवेदन आएपछि मन्त्रालयले यस विषयमा कडा अनुसन्धान गर्ने बताएको छ ।यो कदमपछि जापानमा काम गर्ने उद्देश्यले शरणार्थी बन्न चाहने अवैध आप्रवासीविरुद्धको अभियान अझ दरिलो हुनेछ ।

जापानमा आवेदन दिनेहरुको संख्या सन् २०१० देखि बढ्न थालेको हो । जापान सरकारले अवेदन दिएको छ महिनामा काम गर्न मिल्ने व्यवस्थामा खुकुलो गरेसँगै आवेदन दिने संख्यामा वृद्धि भएको हो ।