दक्षिण कोरियाका पेन्सन कोष प्रमुख पक्राउ

सोल-दक्षिण कोरियाको निवृत्तिभरण कोष नेशनल पेन्सन सर्भिस (एन्पीएस्)का प्रमुख मून ह्युन प्योलाई पक्राउ गरिएको छ । कोरियाली बहुराष्ट्रिय विद्युतीय उपकरण उत्पादक कम्पनी सामसुङसँग मिलेर भ्रष्टाचार गरेको आरोपमा उनलाई पक्राउ गरिएको हो ।

कोरियाको सबैभन्दा ठूलो लगानी गर्ने संस्था एन्पीएस् विश्वको सबैभन्दा ठूलो निवृत्तिभरण कोष पनि हो । अनुसन्धानकर्ताहरूले ८ अर्ब डलरमा भएको चेइल इण्डष्ट्रिज र सामसुङ सी एण्ड टी कर्पोरेशनको मर्जरमा मूनको प्रभाव रहेको सम्बन्धमा छानबिन गरिरहको जानकारी दिइएको छ ।

ती दुई समूह मर्ज हँुदा मून स्वास्थ्यमन्त्री थिए । कोरियाको स्वास्थ्य तथा कल्याण मन्त्रालयले एन्पीएस् सञ्चालन गर्दछ । एन्पीएस्ले ४ खर्ब ५१ अर्ब डलरबराबरको सम्पत्तिको व्यवस्थापन गर्दछ । एन्पीएस् सामसुङको प्रमुख शेयर होल्डर पनि हो ।