नेपाललाई एसिया कप छनोट खेल्ने अवसर

काठमाडौं – शुरुवाती चरणमै पराजित भएर विश्वकप र एसिया कपबाट बाहिरिएको नेपालले फेरि छनौट खेल खेल्न पाउने भएको छ। यसका लागि एसियाली फुटबल महासंघ (एएफसी)ले अखिल नेपाल फुटबल संघ (एन्फा)लाई पत्र पठाइसकेको छ।

भारतसँग पराजित भएसँगै समूह चरणबाटै बाहिरिएको नेपालले तेस्रो चरण छनौट खेलका लागि अवसर पाएका हुन्। तेस्रो चरणको खेलमा छनोट भएको कुवेत र ग्वाम कारबाहीमा परेपछि सोलिडारिटी कप जितेको नेपाल र उपविजेता बनेको मकाउले यो अवसर पाएको हो।

२४ समूहले सहभागिता जनाउँने प्रतियोगितामा आफ्नो स्थानसम्म सुरक्षित गर्ने अवसर एएफसीले दिएको छ। १२ समूह छनोट भइसकेको र बाँकी १२ का लागि २४ समूहबीच स्पर्धा हुँदैछ।६ समूहमा विभाजित तेस्रो चरणको छनोट खेल होम एण्ड अवेका अधारमा हुनेछ। जुन वर्षदिनसम्म चल्नेछ। खेल सन् २०१७ मार्चबाट शुरु हुनेछ।

प्रतियोगिताको ड्र भने जनवरी १८ मा सार्वजनिक गरिने एएफसीले जनाएको छ। छनोटको तेस्रो चरणमा जोर्डन, ओमान, फिलिपिन्स, बहराइन, किर्गिस्तान, उत्तर कोरिया, भारत, प्यालेस्टाइन, ताजकिस्तान, भियतनाम, हङकङ, तुर्कमेनिस्तान, माल्दिभ्स, लेबनान, यमन, अफगानिस्तान, चाइनिज ताइपेई, म्यानमार, मलेसिया, सिंगापुर, कम्बोडिया र भुटान छन्।

सन् २०१९ मा युएईमा एसिया कप हुँदैछ।