ओप्स खेलकुद सप्ताह बुधबारदेखि

काठमाडौं -अर्गनाइजेसन अफ प्राइभेट स्कुल (ओप्स) को आयोजनामा बुधबारदेखि दोस्रो खेलकुद सप्ताह हुने भएको छ । ओप्स अन्तर्गतका १९ विद्यालयको सहभागिता रहेका खेलकुद सप्ताहमा एथलेटिक्स, फुटबल र ब्याडमिन्टनका खेल हुने आयोजकका अध्यक्ष लोकेन्द्रबहादुर खड्काले पत्रकार सम्मेलनमा जानकारी दिए ।
पहिलो संस्करणमा फुटबल मात्र आयोजना गरेको संस्थाले यस पटकदेखि अन्य खेललाई पनि समावेश गरेको हो । आगामी माघ १८ गतेसम्म सञ्चालन हुने खेलकुद सप्ताहका खेलहरु तारकेश्वर नगरपालिकास्थित गोलढुंगाको खेलकुद मैदानमा हुनेछ ।

सप्ताहमा छात्र फुटबलका साथै एथलेटिक्स अन्तर्गत हाइजम्प, लङजम्प, सटपुट, एक सय, दुई सय मिटर र सय मिटरको रिले समावेश गरिएको प्रतियोगिता संयोजक एवं सिर्जना ज्ञान सागर हाई स्कुलका प्रिन्सिपल राजेन्द्र फुयाँलले जानकारी दिए । त्यसैगरी एन्जल हर्ट स्कुलको संयोजनमा हुने ब्याडमिन्टन प्रतियोगितामा छात्र छात्राको सिंगल र मिक्स डबलका एभेन्टहरु सञ्चालन हुने एन्जल हर्ट हाइ स्कुलका प्रिन्सिफल धनबहादुर पुनले पत्रकार सम्मेलनमा बताए ।

अनुमानित ४ लाख रुपैयाँ बजेट रहेको सप्ताह अन्तर्गत फुटबल प्रतियोगिताका वेस्ट किपर, वेस्ट डिफेन्डर, वेस्ट मिडफिल्डर, हाइस्कोरर, वेस्ट कोच, अनुशासित टिम र सर्वोत्कृष्ट खेलाडीलाई नगद पुरस्कारका साथै आकर्षक ट्रफी प्राप्त गर्ने संयोजक फुयाँलले जानकारी दिए ।

‘शारीरिक तन्दुरुस्तीका लागि खेलकुद र समाजका लागि खेलाडी’ भन्ने मुल नाराका साथ आयोजना हुन लागेको खेलकुद सप्ताहको मुख्य उद्देश्य बालबालिको प्रतिभा प्रस्फुटनका साथै कुसल एवं प्रतिभावान खेलाडी उत्पादन गर्नु रहेको ओप्सका अध्यक्ष खड्काले बताए ।