सरस्वती प्रतीक्षा ‘नथिया’ सार्वजनिक

काठमाडौं- नेपाली साहित्य जगतमा कविको रुपमा राम्रो छाप बनाउन सफल सरस्वती प्रतीक्षाले पहिलो उपन्यास  ‘नथिया’ लिएर आएकी छिन | शनिबार नेपाल प्रज्ञा-प्रतिष्ठानको डबलीमा आयोजित कार्यक्रममा बादी समुदायकी अभियन्ता एवं प्रदेशसभा सांसद उमा बादीले ‘नथिया’ सार्वजनिक गरिन्।

बादी समुदायभित्रको यौन व्यवसाय र त्यसप्रति बादी परिवारकै एउटी युवतीको विद्रोह प्रस्तुत गरिएको कृतिको रचनागर्भ सुनाउँदै लेखक प्रतीक्षाले यस्तो संवेदनशील विषयमा साहसले नभई दुस्साहसले लेखेको बताइन्।

‘बादी महिलाहरुसँग संवाद गरेर यथार्थ लेखेकी हुँ’, उनले भनिन्, ‘देह व्यापारसँग जोडिएको यो कथामा कति यातना र कठोर कुरा छन्, जो मैले लेख्न सकेकी छुइनँ।’

प्रतीक्षाको ‘यद्यपि प्रश्नहरु’, ‘विम्बहरुको कठघरा’, ‘बागी सारङ्गी’ कविता संग्रह प्रकाशन भईसकेका छन् ।कार्यक्रममा फिल्म निर्देशक दीपेन्द्र के खनालले ‘नथिया’माथि फिल्म बनाउने घोषणा गरे।

पुस्तक बुक-हिल पब्लिकेसनले प्रकाशनमा ल्याएको हो।