सेयर बजारमा चमक आउने संकेत, बढ्यो कारोबार

काठमाडौं – छैठौ दिनसम्म निरन्तर दोहोरो अंकले ओरालो लागेको शेयर बजारमा मंगलबार तिब्र उतार चढाबका बिच केही स्थिर हुने संकेत देखा परेको छ । नयाँ अर्थमन्त्रीको नीति तथा कार्यक्रम कस्तो आउला भन्ने आशाका बिच बजार ५.८६ अंकको सुधार सहित बन्द भएकाे छ ।

बजार खुलेकाे एक घण्टा ४५ मिनेट समान्य रहेकाे बजार त्यसपछि १६ अंक माथि चढेर १३७७ विन्दुमा पुगेकाे थियाे । ६ दिनदेखि राताम्मे भएकाे बजार एक्कासी उकालाे लागेपछि सेयर विक्रीबतार्हरूकाे चाप थेग्न नसक्दा सो वृद्धि टिक्न सकेन र अन्त्यमा सेयर बजार परिसुचक नेप्से १३६४ दशमलव ८१ बिन्दुमा बन्द हुन पुग्याे ।

यसअघि ६ काराेबार दिनमा ६६ अंकले ओरालो लागेको बजारमा मंगलबार ५.८६ अंकको सुधार आउनु तथा कारोबार रकम समेत बढ्दै जानुले बजार स्थिर हुन खाजेको संकेत मिल्छ ।

मंगलबार सेयर बजारमा १५३ कम्पनीको ११ लाख ५१ हजार कित्ता सेयर ५५ करोड ६८ लाख रुपैयाँमा खरिदविक्री भएका छन् । कारोबारमा आएका नौ उपसमूहमध्ये पाँच उपसमूह बढेका छन् भने चार घटेका छन् । यसदिन होटल्स समूह ३१.२६ अंकले बढ्दा उत्पादन समूहमा १०.४१ अंकको गिरावट आएको छ ।

बजारमा सबैभन्दा बढी कारोबार हुने बाणिज्य बैंकको उपसमूह ५.८६ अंकले बढेको छ भने सेन्सेटिभ इन्डेक्स १.५१ अंकले बढेर २८९.१६ मा पुगेको छ । यसदिन अन्य समूह, फाइनान्स, लघुवित्त समूह हरियो बने भने बीमा,जलविद्युत्त र विकास बैंक उपसमूह घटेको छ ।

सोमबार ७० प्रतिशत लाभांश घोषणा गरेको नेपाल लाइफको ६ करोड ७१ लाख रुपैयाँ तथा प्रभु बैंकको दुई लाख ७१ हजार कित्ता सेयर विक्रीबाट ६ करोड १८ लाख रुपैयाँको कारोबार भएको छ । नेपाल लाइफ र प्राइम लाईफ इन्स्योरेन्सको संस्थापक सेयर पाँच करोड बढीको खरिदविक्री भएका छन् ।