नेपाल अन्तर्राष्ट्रिय फिल्म फेष्टिवलमा चलचित्र ‘भोर’ले पायो उच्च तारिफ

काठमाडौँ : ऐतिहासिक चलचित्र ‘झोला’का निर्देशक यादव कुमार भट्टराईद्वारा निर्देशित पछिल्लो चलचित्र ‘भोर’ नेपाल अन्तर्राष्ट्रिय फिल्म फेष्टिवलमा प्रदर्शन गरिएको छ ।

दाइजो प्रथामा आधारित चलचित्र ‘भोर’ आज फाल्गुन ११ गते शनिवार बेलुका ४ः३० बजे राष्ट्रिय सभागृहमा प्रदर्शन पछी धेरै दर्शकले चलचित्रको उच्च तारिफ गरेका छन ।

चलचित्र हेरे पश्चात धेरै दर्शकहरुले चलचित्रको बिषय बस्तु गम्भिर भएकोले पुन एक पल्ट सार्वजनिक प्रदर्शन गर्नु पर्ने सुझाव दिएका थिए । चलचित्रले तराइको बिषय उठान गरेपनी देशको हरेक कुना कुनामा चलचित्रको बिशेष प्रदर्शन गरी जनतालाई दाईजोले पारेको प्रभाबको बारेमा सुशुचित गर्नपर्ने सुझाएका थिए ।

चलचित्र प्रदर्शनमा तराइ समुदायका दर्शकहरुको पनि बाक्लै उपस्थिती रहेको थियो । उनिहरुले फिल्ममा देखाइएका घटना आफुहरुले वास्तविक आँखाले देखेको भन्दै राज्यले मधेसका हरेक गाउ गाउमा यो चलचित्र देखाउन पहल गर्नु पर्ने माग गरेका थिए ।

चलचित्र भोर हेरिसकेपछी दर्शक सँगको साक्षात्कार कार्यक्रममा अधिकांस दर्शकहरुले आफुलाई चलचित्रको बिषयबस्तु, प्रस्तुती र यसले दिन खोजेको शन्देशले आफुहरुको मन छोएको प्रतिकृया दिएका थिए । चलचित्रलाई देशमा मात्र नभै अन्तराष्ट्रिय स्तरमा पुर्याउन पर्ने उनिहरुको माग थियो ।

यस्तै कती दर्शकले राज्यले बनाउनु पर्ने चलचित्र ब्यक्तीले बनाएको भन्दै राज्यको तर्फ बाट भोर टिमलाई उचित सम्मान दिनु पर्ने बताएका थिए । चलचित्र प्रदर्शन पश्चात चलचित्रका लेखक कृष्ण धारावासी, कार्यकारी निर्माता देबेन्द्र प्रसाद सुबेदी, निर्माता रामगोपाल थापा र सहायक निर्देशक किसन अर्यालले दर्शकहरुबाट आएका जिज्ञासाहरुलाई मेटाउने प्रयास गरेका थिए । निर्देशक यादव कुमार भट्टराई बिशेष कारणबस देश बाहिर रहेकोले कार्यक्रममा उपस्थित हुन सकेनन ।

विशेष गरी नेपालको तराई क्षेत्रमा विद्यमान दाईजो प्रथा विरुद्धको संघर्षलाई चलचित्र ‘भोर’मा उतारिएको छ । फिल्म फेष्टिवलमा आफ्नो चलचित्रलाई दर्शक हरुले मन पराएकोमा निर्देशक भट्टराईले खुशी व्यक्त गरे । फागुन ९ गतेदेखि सुरु भएको फेष्टिवल फाल्गुन १३ गतेसम्म भृकुटीमण्डप स्थित नेपाल पर्यटन बोर्ड र राष्ट्रिय सभागृहमा चल्नेछ ।

मिडिया फर कल्चरको ब्यानरमा निर्माण भएको चलचित्रमा रामनारायण ठाकुर, डली सरकार, प्रमेश झा, अनितारानी मण्डल, विष्णुकान्त झा, राजेश सक्सेना, बिएन पटेल, पुजा कर्ण लगायतका कलाकारको अभिनय रहेको छ ।

चलचित्रले नेपाली समाजमा बिशेषगरी तराई क्षेत्रमा दाइजो प्रथाले निम्त्याएको विकृति र त्यसबाट उत्पन्न विभिन्न समस्याको छर्लङ्ग चित्रण गर्ने प्रयास गरेको छ । चलचित्रले दाइजोका कारण समाजमा कयौँ घटनाहरुको जन्म हुन्छ भन्ने एक सशक्त सन्देश दिन सफल भएको देखिन्छ ।

देबेन्द्र सुबेदी प्रस्तुतकर्ता रहेको चलचित्रमा राज तिमल्सिना र राम गोपाल थापा निर्माताको रुपमा रहेका छन् । दिपक अधिकारी र किसन अर्यालको मुख्य सहायक निर्देशन रहेको चलचित्रमा दिपक बज्राचार्यको छायान्कान रहेको छ ।