सेना दिवस : टुँडिखेलमा विशेष कार्यक्रम

काठमाडौं : नेपाली सेनाले आज शिवरात्री तथा सेना दिवश विशेष कार्यक्रम गरी मनाउँदै छ । सेनाले दिवसको अवसरमा सैनिकमञ्च टुँडिखेलमा विहान साढे १० बजेपछि विशेष कार्यक्रमको आयोजना गर्न लागेको हो । दिवसको अवसरमा उत्कृष्ट गण तथा गुल्मलाई पुरस्कृत गरिने र नयाँ स्थापना भएका गणलाई निशानी चिन्ह प्रदान गरिने सैनिक जनसम्पर्क निर्देशनालयले जनाउको छ । यो वर्ष दुई वटा नयाँ गण स्थापना भएका छन् ।

कार्यक्रममा सैनिक कवाज, हतियार तथा उपकरण प्रदर्शन, ब्याण्ड, विशेष फौज लगायतका प्रदर्शनी गरिने सेनाले जनाएको छ । यस्तै प्यारासुटको माध्यमबाट फ्रि फल जम्पको पनि प्रदर्शन गरिने छ भने ७ वटै प्रदेशको संस्कृतिलाई देखाउने झाँकी समेत प्रदर्शनको तयारी छ । यसैबीच सेना दिवसको अवसरमा सेनाको परमाधिपति समेत रहेका राष्ट्रपति विद्यादेवी भण्डारी, उपराष्ट्रपति नन्द बहादुर पुन र प्रधानमन्त्री केपी शर्मा ओलीले शुभकामना दिनुभएको छ । प्रधानमन्त्री ओलीले दिनुभएको शुभकामना सन्देशमा सेनाको व्यावसायिक क्षमता वृद्धि गर्न सरकारले आवश्यक पहलकदमी लिने उल्लेख गर्नुभएको छ ।