जापान र नेपालबीच श्रम सम्झौता

काठमाडौं । नेपाली कामदार लैजाने विषयमा जापान र नेपालबीच श्रम सम्झौता भएको छ । सोमबार राजधानीमा एक कार्यक्रममा श्रम सम्झौता भएको हो । सम्झौतापत्रमा श्रम, रोजगार तथा सामाजिक सुरक्षा मन्त्रालयका सहसचिव रामप्रसाद घिमिरे र जापानका तर्फबाट नेपालका लागि जापानी राजदूत मासामिची साइगोले हस्ताक्षर गरेका छन् ।

मन्त्रालय अन्तर्गतको एउटा विभागले संयन्त्र बनाएर त्यसमार्फत काम अघि बढाउने सहमति भएको छ । सम्झौता अनुसार जापानले जापानी भाषा परीक्षा पास गरेका कामदारलाई कामका लागि लैजाने भएको छ । संयन्त्रले अप्रिल १ देखि काम थाल्ने र भाषा परीक्षा उत्तीर्ण गर्नैपर्ने सम्झौतामा उल्लेख छ ।

जापानले कृषि, होटल, उद्योग, सुरक्षा, नर्सिङ लगायत एक दर्जन भन्दा बढी क्षेत्रमा काम गर्नका लागि नेपाली श्रमिकहरु लैजान लागेको हो । सम्झौतापछि अब भाषा जानेका र हातमा सिप भएकाहरु सजिलै जापानमा जान पाउनेछन् ।

जापानमा श्रमिकहरुको अभाव रहेकोले दक्ष र अर्धदक्ष दुवै खालका श्रमिकहरु त्यता लगिने सम्भावना रहेको बताइएको छ ।