घाइतेहरुको उपचार प्रबन्ध मिलाउन देउवाको आग्रह

काठमाडौं । पूर्वप्रधानमन्त्री एवम् प्रमुख प्रतिपक्षी दल नेपाली कांग्रेसका सभापति शेरबहादुर देउवाले आइतवर गएको भीषण हावाहुरीबाट घाइते भएकाहरुको उपचारका लागि थप प्रबन्ध मिलाउन सरकारसँग आग्रह गरेका छन् । मंगलबार बिहान वीरगञ्जको नारायणी अञ्चल अस्पतालमा उपचार गराइरहेका घाइतेहरुको स्वास्थ्य अवस्थाका बारेमा जानकारी लिएपछि सभापति देउवाले सरकारलाई उपचारका लागि थप प्रवन्ध मिलाउन आग्रह गरेका हुन् ।
उनले हावाहुरीका कारण घाइते भएका नागरिकको उपचारमा अझै चुस्सता आवश्यक रहेको बताएका छन् । घाइतेहरुको उपचारका लागि केन्द्रबाट सरकारले चिकित्सक र स्वास्थ्यकर्मीहरु प्रभवित क्षेत्रमा पठाउनपर्ने देखिएको सभापति देउवाको भनाइ छ ।
सभापति देउवा मंगलवार बिहान सहमहामन्त्री डा. प्रकाशशरण महतका साथ हेलिकप्टरबाट हावाहुरी प्रभावित क्षेत्रको स्थलगत निरीक्षणमा गएका थिए ।
‘‘हावाहुरीका कारण घाइते भएका साथीहरुलाई वीरगञ्जको नारायणी अञ्चल अस्पतालमा आएर भेट गरे । उनीहरुको उपचारमा अझै चुस्तता आवश्यक छ । सरकारले केही चिकित्सक र स्वास्थ्यकर्मीहरु केन्द्रबाट पठाउनु पर्ने देखिएको छ । त्यसको प्रवन्ध गर्न म सरकारसँग आग्रह गर्दछु’’ घाइतेहरुको अवस्थाका बारेमा जानकारी लिएपछि उनले ट्विट गर्दै भनेका छन् ।
आइतबार बेलुकी बारा र पर्सामा अचानक आएको भीषण हावाहुरीमा परी २७ जनाको मृत्यु भएको छ भने सयौं मानिसहरु घाइते भएका थिए । घाइतेहरुको स्थानीय अस्पतालसँगै काठमाडौंका विभिन्न अस्पतालमा उपचार भइरहेको छ ।