आठौं राष्ट्रिय खेलकुद पाँच खेल आजदेखि

काठमाडौं । आठौं बृहत् राष्ट्रिय खेलकुद प्रतियोगिता आजबाट सुरु हुँदै छ । आठौं संस्करणको बृहत् राष्ट्रिय खेलकुदमा ३५ खेल समावेश भए पनि उद्घाटनअघि विभिन्न पाँच खेलमा प्रतिस्पर्धा बुधबारदेखि नै सुरु हुनेछ ।

आठौं राष्ट्रिय खेलकुदको औपचारिक उद्घाटन ५ वैशाखमा हुने भए पनि पाँच खेल भने पूर्वनिर्धारित तालिकाअनुसार बुधबारदैखि नै हुन लागेको हो । समापन ११ वैशाखमा हुनेछ । उद्घाटन र समापन दुवै नेपालगन्ज रंगशालामा हुने कार्यक्रम रहेको छ ।

दाङको घोराही कभर्डहलमा टेबलटेनिस, कपिलवस्तुको जितपुरस्थित सिद्धार्थ क्याम्पसमा कुस्ती, नेपालगन्जको मंगलप्रसाद उमाविमा पुरुष हक्की, ललितपुरको सातदोबाटोमा स्क्वास र बुटवलमा लनटेनिस हुनेछन् । महिला हक्की भने नेपालगन्जको खजुरास्थित शुक्र माविमा ३० चैतदेखि मात्र सुरु हुनेछ । उद्घाटनअघि यी पाँच खेलसहित विभिन्न १४ खेलको राष्ट्रिय प्रतियोगिता सम्पन्न भइसक्नेछ ।

बुधबार हुने खेलबाहेक बक्सिङ, कबड्डी, जुडो, बास्केटबल, बुद्धिचाल, फुल कन्ट्याक्ट कराते, साइक्लिङ, फेन्सिङ र गोल्फ उद्घाटनपूर्व सकिनेछ । आठौं राष्ट्रियमा विभिन्न ३५ खेल समावेश छन् । बृहत् राष्ट्रिय खेलकुदकै इतिहासमा प्याराग्लाइडिङ खेल पहिलोपटक समावेश गरिँदा एनआरएनए टिम पनि पहिलोपटक सहभागिता जनाएको छ ।

बृहत् राष्ट्रिय खेलकुदको पहिलो, दोस्रो र तेस्रो संस्करणबाहेक दुई वर्षको अन्तरालमा पहिलोपटक आठौं राष्ट्रिय खेलकुद हुन लागेको हो ।

स्क्वास

स्क्वासमा प्रदेश १, २, ३, ५, गण्डकी प्रदेश, नेपाल प्रहरी र एपीएफ क्लबबाट २४ पुरुष र पाँच महिला गरी २९ खेलाडीको सहभागिता रहनेछ । पुरुष÷महिला सिंगल्स तथा पुरुष टिम इभेन्ट गरी तीन स्पर्धामा प्रतिस्पर्धा हुनेछ । प्रतियोगिता २ वैशाखमा सम्पन्न हुनेछ ।

हक्की

हक्कीको पुरुषमा सातै प्रदेश, डिफेन्डिङ च्याम्पियन नेपाल आर्मी र प्रहरीसहित नौ टिमले भाग लिनेछन् । सहभागी टिमलाई दुई समूहमा विभाजन गरी लिग कम नकआउट आधारमा खेल खेलाइनेछ । फाइनल ४ वैशाखमा हुनेछ ।

महिला हक्की भने ३० चैतदेखि नेपालगन्जको खजुरास्थित शुक्र माविमा हुनेछ । सहभागी ६ टिमले दुई समूहमा रहेर लिग कम नकआउट आधारमा प्रतिस्पर्धा गर्नेछन् । सहभागी टिमहरूमा प्रदेश १, २, ३, ४ र ७ तथा आर्मी छन् । सातौं राष्ट्रिय खेलकुदमा प्रदेश ७ च्याम्पियन बनेको थियो । फाइनल ५ वैशाखमा हुनेछ ।

लनटेनिस

बुटवलमा हुने लनटेनिसमा प्रदेश ३, ५, गण्डकी प्रदेश, आर्मी, एपीएफ र एनआरएनबाट खेलाडीले प्रतिस्पर्धा गर्नेछन् । पुरुष÷महिला सिंगल्स, डबल्स र टिम तथा मिक्स डबल्स गरी सात स्पर्धामा भिडन्त हुनेछ । २ चैतसम्म चल्ने प्रतियोगतामा २८ पुरुष र १५ महिला खेलाडीले सहभागिता जनाउनेछन् । त्यसमा एनआरएनएबाट तीन पुरुष खेलाडी संरक्षकभूषण बज्राचार्य र अमृत पौडेल (दुवै अस्ट्रेलिया) तथा दावा शेर्पा (थाइल्यान्ड) ले प्रतिस्पर्धा गर्नेछन् ।

कुस्ती

कुस्तीमा पुरुष÷महिलातर्फ समान १०–१० गरी २० स्पर्धामा खेल हुनेछ । सातै प्रदेश र दुई विभागीय (आमी÷प्रहरी) गरी नौ टिमले भाग लिनेछन् ।

टेबलटेनिस

टेबलटेनिसमा सात प्रदेश, तीन विभागीय (आर्मी÷प्रहरी÷एपीएफ) बाट १२० खेलाडीले प्रतिस्पर्धा गर्नेछन् । पुरुष÷महिला सिंगल्स, डबल्स र टिम तथा मिक्स डबल्स गरी सात स्पर्धा समावेश छन् । आठौं राष्ट्रिय खेलकुदमा समग्रमा २८ सय २५ पुरुष तथा २३ सय ८६ महिला गरी जम्मा ५२ सय ११ खेलाडी सहभागी हुनेछन् । ३७२ स्वर्ण, त्यत्ति नै रजत र ५६३ कांस्यका भिडन्त हुनेछ ।