नेकपामा पोलिटब्युरो गठन हुँदै

काठमाडौँ : पार्टी एकता घोषणा भएको एकबर्ष पुग्नै लाग्दा नेकपाले पोलिटब्युरो गठन गर्ने भएको छ। केन्द्रीय समितिको एकतिहाई हुने गरि १ सय ४७ सदस्यीय पोलिटब्युरो गठन हुन लागेको हो।

यसअघि नै साविकको एमाले र माओवादीले पोलिटब्युरोको भागवण्डा टुङ्ग्याइसकेका छन्। भागवण्डा अनुसार, साविकको एमालेबाट ८१ जना र माओवादीबाट ६६ जना पोलिटब्युरोमा चयन हुनेछन्।

तत्कालिन एमालेमा ६५ सदस्यीय पोलिटब्युरो थियो। त्यसमा थप १६ जना पोलिटब्युरो साविक एमालेले पाउने छ। तत्कालिन माओवादीले भने आफ्ना सदस्य घटाउनुपर्ने छ। ९९ सदस्यीय सचिवालय सदस्यमध्ये ६६ जनालेमात्र नेकपामा पोलिटब्युरो हुनपाउने छन्। पूर्वमाओवादीबाट बरिष्ठताका आधारमा पोलिटब्युरो सदस्यका चयन गरिने छ।

साविकको एमालेले पोलिटब्युरो चयनका लागि मापादण्ड बनाएको नेकपाका स्थायी समिति सदस्य सुरेन्द्र पाण्डेले बताए।

‘विगतमा पोलिटब्युरोमा रहेका सबै पर्ने नै भए’, पाण्डेले भने, ‘थप गर्दा विगतमा पोलिटब्युरोमा रहिसकेको र अहिले केन्द्रीय समितिमा रहेकाले प्राथमिकता पाउँछन्।’

त्यसबाहेक चौंथो महाधिवेशनमा वा पाँचौ/छैठौंमा पोलिटब्युरो सदस्य भएका र अहिले केन्द्रीय समितिमा रहेको व्यक्तिले प्राथमिकता पाउने पाण्डेले बताए।

‘कोही विगतमा पटक पटक केन्द्रीय समितिमा रहेका र बीचमा नभएका रहेछन् भनेपनि उसले प्राथमिकता पाउने मापदण्ड बनेको छ,’ पाण्डेले भने, ‘एक पटकको केन्द्रीय समिति कार्यकाल पूरा भएको र अहिले केन्द्रीय समितिमा रहेको व्यक्ति चयन गर्ने तयारी छ।’

उनले त्यसबाहेक कम्तिमा दुईपटक केन्द्रीय समितिमा रहेका महिला, दलित, जनजातिलाई पोलिटब्युरोमा ल्याउने तयारी भैरहेको बताए।

पोलिटब्युरो चयनका लागि स्पष्ट मापदण्ड तयार भएकाले साविकको एमालेको ओली पक्ष र माधव नेपाल पक्ष भनेर पोलिटब्युरो गठनमा भागवण्डाको प्रश्न नउठ्ने पाण्डेले बताए।

‘फेरी आज कोही कुन पक्षमा रहेछ भने सँधै त्यही ठाउँमा रहन्छ भन्ने हुदैंन’, नेता पाण्डेले भने, ‘पक्ष त बदलिन सक्छ।’

अमेरिका भ्रमणमा रहेका बरिष्ठ नेता माधव नेपाल फर्किए लगत्तै पोलिटब्युरो घोषणा गर्ने तयारी नेकपाको छ।

आउँदो जेठ ३ गते तत्कालिन एमाले र माओवादी एकीकृत भएको एक बर्ष पुग्दैछ। नेकपाले एकताको एघार महिना पछि जिल्ला कमिटीको नेतृत्व टुङ्ग्याएको थियो।

अझैपनि पार्टीका जनवर्गीय संगठनको एकता हुन। सेतोपाटि