‘फानी’ असर नेपालमा पनि, हावाहुरीसहित वर्षा सचेत रहन आग्रह

काठमाडौं : बंगालको खाडीबाट विकसित सामुन्द्रिक आँधी ‘फानी’को प्रभाव नेपालमा पनि देखिन थालेको छ। शुक्रबार विहानैदेखि देशको पूर्वी क्षेत्रका केही ठाउँमा मौसम बद्ली भई मेघगर्जनसहित पानी पर्न सुरु भएको जल तथा मौसम विज्ञान विभागको मौसम पूर्वानुमान महाशाखाले जनाएको छ। फानीको प्रभावका कारण दिउँसोपख मध्य र पश्चिमी क्षेत्रका केही ठाउँमा पनि हावाहुरी र चट्याङसहित पानी पर्ने मौसमविद् विभूति पोखरेलले बताइन्। पूर्वी क्षेत्रमा यसको प्रभाव तुलनात्मक रुपमा बढी हुने भएकाले सतर्क रहन महाशाखाले आग्रह गरेको छ। फानीकै प्रभावले उच्च पहाडी क्षेत्रमा हिमपातको पनि संभावना छ। फानीको प्रभाव भोलीसम्म रहने र आइतबारदेखि मौसम खुल्ने महाशाखाले जनाएको छ।