नेइमारलाई फर्काउने प्रस्ताब पिएसजीद्वारा अस्वीकार

काठमाडौं-नेइमारलाई फर्काउने स्पेनिस बार्सिलोनाले राखेको प्रस्ताब फ्रेन्च क्लब पिएसजीले ठाडै अस्वीकार गरेको छ ।

फ्रेन्च मिडिया ‘टेलिफुट’का अनुसार बार्सिलोनाले हालै मात्रै ब्राजिलियन नेइमारका लागि लिग वान च्याम्पियनसँग प्रस्ताव गरेको थियो । तर, पिएसजीले आफ्ना प्रमुख खेलाडीका लागि स्पेनको प्रस्ताव अस्वीकार गरेको हो |

ब्राजिलियन मिडियाले भने ‘नेइमार र बार्सिलोनाबचि ५ वर्षका लागि सम्झौता भएको’ खबर प्रकाशित गरेको थियो । यस्तै खबर स्पेनका मिडियाले पनि छापेका थिए ।

तर, त्यस्तो सहमति क्लब बार्सिलोना र नेइमारबीच मात्रै भएको थियो । नेइमार बार्सिलोना फर्किन क्लब पिएसजी पनि सहमत हुनु आवश्यक हुन्छ ।

पिएसजीले नेइमारलाई सन् २०१७ मा विश्वकीर्तिमानी २२२ मिलियन युरोमा अनुबन्ध गरेको थियो । पेरिसमा दुई सिजन बिताएका नेइमारले ठूला सफलता पाउन नसकेपछि निराश भएर क्लब छाड्ने तयारी गरेका हुन् ।

उनी अहिले व्यक्तिगत रूपमा पूर्वक्लब बार्सिलोना फर्किन तयार छन् । बार्सिलोना पनि नेइमार फर्काउन लागेको छ । तर, पिएसजीले नेइमारलाई बार्सिलोनाले चाहेजसरी सजिलै बिदा गर्ने पक्षमा देखिँदैन ।

फ्रेन्च मिडियाका अनुसार पिएसजी नेइमारका लागि २५० मिलियनभन्दा कम मूल्यमा बेच्ने पक्षमा छैन । यसअघि फ्रान्सकै मिडियाले पिएसजीले नेइमारका लागि ३०० मिलियन युरो मूल्य तोकेको खबर प्रकाशित गरेको थियो ।

बार्सिलोनाले नेइमार फर्काउन एक खेलाडीसहित कूल मूल्यांकन २०० मिलियन युरो हुने गरी प्रस्ताव गरेको उल्लेख छ । उसले पिएसजीले चाहे आफ्नो टोलीका केही खेलाडीसमेत नेइमारको डिलमा राख्ने बताएको छ ।