उत्तर कोरियाले भन्यो ‘ट्रम्पको निम्तो एक रोचक सुझाव’

काठमाडौं- उत्तर कोरियाले अमेरिकी राष्ट्रपति डोनाल्ड ट्रम्पको निम्तोलाई ‘रोचक सुझाव’ भनेको छ |

अमेरिकी राष्ट्रपति डोनाल्ड ट्रम्पले उत्तर कोरियाली नेता किमलाई ट्वीटमार्फत भेट्ने निम्तो दिएको केहि घण्टा नबित्दै उत्तर कोरियाले सो जवाफ दिएको हो |

शनिबार उत्तर कोरियाली विदेशमन्त्री छे सुन हुइले भने ‘हामीले राष्ट्रपति ट्रम्पको कोरियाको सिमा डीएमजेडमा भेट्ने निम्तोलाई ‘अत्यन्तै रोचक सुझाव’ को रूपमा लिएका छौं |’ उनले थपे ‘तर हामीले यस सम्बन्धमा आधिकारिक प्रस्ताव प्राप्त गरेका छैनौं |’

अमेरिकी राष्ट्रपति ट्रम्पले जापानमा भएको जी ट्वान्टी सम्मेलन सकेर दक्षिण कोरिया जाँदै गर्दा ट्वीट गरेर किमलाई भेटको आग्रह गरेका थिए |

राष्ट्रपति ट्रम्पले ट्वीटमा किमलाई सीमानामा भेटेर ‘हेलो’ भन्दै हात मिलाउने उल्लेख गरेका थिए |