सर्वनाममा नाटक ‘विकास भर्सेस निकास’

काठमाडौं : काठमाडौंको डिल्लिबजार कालिकास्थानमा अवस्थित सर्वनाम थियटरमा नाटक ‘बिकास भर्सेस निकास’ मन्चन भैरहेको छ । राम बाबु रेग्मिको लेखन तथा निर्देशन साथै टेलिचलचित्र भद्रगोलका ‘काकु’ दिपक आचार्यको मुख्य भूमिका रहेको नाटक गत असार १३ गते देखी मन्चन सुरु गरिएको हो ।

नाटक असार २८ गतेसम्म मन्चन हुनेछ । रंगकला गोरखाको प्रस्तुति रहेको नाटकको बिषयबस्तु अहिलेको नेपालको वर्तमान परिस्थितिलाइ जस्ताको तस्तै रुपमा प्रस्तुत गरिएकोले दर्शकको राम्रो प्रतिकृया पाएको निर्देशकले बताए ।

‘यो नाटक मैले रत्नपार्कमा दिनहु हिड्दा देखिरहेको दृश्य र गोरखाको गाउहरुमा सडक नाटक गर्नको लागि घुमिरहदा मेरो मनमा गडेको बिषय बस्तुलाई एउटा काल्पनिक कथाको रुपमा चित्रण गर्न खोजेको हुँ’ निर्देशक रेग्मिले भने । राम बाबुका अनुसार देशको नीति नियम तथा सामाजिक सोच लाई फरक दृष्टिकोणबाट नाटकमा प्रस्तुत गरिएको छ । झट्ट सुन्दा विकासे नाटक जस्तो बिषय देखिए पनि यसको सेन्टीमेन्टको लागि आफुले यो कथा छानेको रेग्मिले बताए ।

नाटकमा दिपक आचार्य ‘काकु’, प्रकाश कट्टेल, अजय रेग्मी, मिलन गुरुङ्ग, विक्रम माझी, गौरब सापकोटा, सन्दिप घिमिरे, उमाकान्त सापकोटा, अमृता श्रेष्ठ, सुरज के सी, ससांक उप्रेती, प्रियना आचार्य र प्रेम अर्यालको अभिनय रहेको छ । विपुल थापामगरको संगित संयोजन तथा हुम बिसीको मञ्च परिकल्पना रहेको नाटक हरेकदिन बेलुका ५:३० बजेदेखी तथा शनिबार अतिरिक्त शो दिउसो १ बजे देखी पनि मन्चन भैरहेको छ ।