ईपीएस पास गरेको दुई दिनमै टिफरले किचेर मृत्यु

काठमाडौं-यसपालीको ईपीएस परीक्षा पास गरेका सोलुखुम्बुका फ्रेमकुमार राई कोरिया जाने अनेक सपना देखिरहेका थिए | असार १३ गते राती नै आफुले यसपालीको ईपीएस परीक्षा पास गरेको थाहा पाए र परिवार साथीभाईबाट बधाई लिए |

राईले कोरिया गएर धन कमाउने परिवारलाई खुशी राख्ने र भविष्यको करियर बनाउने अनेक रंगिन सपना देखे तर त्यो सपना दुई दिन पनि कायम रहन सकेन | उनको सपनामात्र होइन उनको भौतिक शरीर समेत सधैंको लागि माटोमा मिल्यो |

नेपाली सडकमा टिफरलाई यमराज भन्ने गरिन्छ | त्यहि यमराजले राईको रंगिन सपना र देशको लागि चाहिने भर्बराउँदो युवाको जोसलाई माटोमा मिलायो |

राईलाई गत असार १५ गते राती भक्तपुर राधे राधेमा टिफर नामक यमराजले किच्यो | उनको घटनास्थल मै मृत्यु भयो |

उसुहान कोरियन ल्वान्ग्वेज इन्स्टिच्युटमा कोरियन भाषा पढेर पास गरेका राईको मृत्युले परिवार,आफन्तलाई मर्माहित त बनाएको छ | उनलाई पढाउने शिक्षक भारत पाठक समेत मर्माहित भएका छन् |