लिबियामा भएको हवाई हमलामा ४० को मृत्यु

काठमाडौं-लिबियामा आप्रवासीहरूलाई राखिएको एउटा बन्दीगृहमा हवाई हमला हुँदा कम्तीमा ४० जना मारिएको अधिकारीहरूले बताएका छन्।

बीबीसीले जनाए अनुसार सो आक्रमणमा थप ८० जना घाइते भएका छन्। हमला राजधानी त्रिपोलीको पूर्वी तजोरामा रहेको एउटा बन्दीगृहमा भएको हो।

मारिनेमध्ये धेरैजसो अफ्रिकी आप्रवासीहरू रहेको बताइएको छ।

पछिल्ला वर्षमा युरोप जान खोज्ने आप्रवासीका लागि लिबिया एउटा मुख्य प्रस्थानविन्दू बन्ने गरेको छ।

आपत्कालिन सेवा सम्बन्धी निकायका एकजना प्रवक्ता ओसामा अलीले समाचार संस्था एएफपीलाई बताए अनुसार प्रत्यक्ष हमला हुँदा १२० जना आप्रवासीहरू बन्द कोठाभित्र थिए।

अहिलेसम्मको मृतकको सङ्ख्या ‘प्रारम्भिक’ भएकोले थप मानिसहरू मारिएका हुनसक्ने ती प्रवक्ताले बताए।

सरकारले बुधवारको हमला स्वघोषित लिबियन न्यासनल आर्मी (एलएनए) लाई दोष लगाएको छ।