बजारमा सेञ्चुरी र प्राइम कमर्सियल बैंकका मर्जकाे चर्चा

काठमाडौं। राष्ट्र बैंकले बिहीबारसम्म मर्जरका लागि जोडी खोज्न निर्देशन दिएपछि बैंकर्स संघले मंगलबार बैठक डाक्दै दुई वटा निर्णय गरेको छ।

२८ वटै बैंकका प्रमुख कार्यकारी र प्रतिनिधिहरु उपस्थित बैठकले संख्या घटाउने बिषयलाई समर्थन गर्दै बिहीबारसम्म सबै बैंकले मर्जर समिति गठन गरेर राष्ट्र बैंकलाई जानकारी गराउने निर्णय भएको छ। साथै यसबीचमा कसको कोसँग छलफल भइरहेको छ भन्ने जानकारी दिन पनि सहमति भएको छ।

बैठकमा संघका अध्यक्ष ज्ञानेन्द्र ढुङ्गानाले सेञ्चुरी र प्राइम कमर्सियल बैंकका प्रमुख कार्यकारीहरुलाई ‘तपाईँहरुको त कुरा मिल्यो होइन?’ भनेर सोधेका थिए। ढुङ्गानाको जिज्ञासामा दुबैका प्रमुख कार्यकारीले हो पनि भनेनन्, होइन पनि भनेन्। मुस्कुराए मात्र।

त्यही प्रश्न ग्लोबल आइएमइ र मेगा बैंकका प्रमुख कार्यकारीलाई पनि सोधिएको थियो। उनीहरुले पनि मुस्कुराएर मात्र प्रतिकृया जनाएको सहभागी एक बैंकले जानकारी दिए।

बैठकमा मर्जर भन्ने कुरा हतार गरेर भन्दा पनि सहज रुपमा अगाडि बढ्नु पर्ने धारणा राखिएको थियो। त्यसैले बैंकरले तत्काललाई मर्जर समिति बनाएको जानकारी राष्ट्र बैंकलाई दिने छन्।