सञ्चय कोष भवन व्यापार संघ काठमाडौं मल चयन नयाँ कार्यसमिति द्वारा विधिवत रुपमा काम शुरू

काठमाडौं । काठमाडौंको सुन्धारास्थित कर्मचारी सञ्चय कोष ईकाइको ‘काठमाडौं मल’मा ‘सञ्चय कोष भवन व्यापार संघ काठमाडौं मल’को नयाँ कार्यसमितिले विधिवत रुपमा काम शुरू गरेको छ । बुधबार काठमाडौंमा मलमा आयोजित विशेष कार्यक्रममा संघलाई सन्चय काेषाकाे सुन्धारा ईकाइमा दर्ता गरिएको जानकारीसहित नयाँ कार्यसमितिको जानकारी दिइएको हो । यसअघिको कार्यसमितिलाई नवीकरण गरिएको थिएन । नवीकरण हुन नसक्दा व्यापारीहरू अन्यौलमा थिए ।

कर्मचारी सञ्चय कोष सुन्धारा भवन ईकाइका प्रमुख मुक्तिनाथ सुवेदीको प्रमुख आतिथ्यमा कार्यक्रम सम्पन्न भएको थियो । कार्यक्रममा कोषका पूर्व ईकाइ प्रमुख केशव आचार्यलाई विदाइ गरिएको थियो । आचार्यको ईकाइबाट शरुवा भएको छ । कार्यक्रम नयाँ कार्यसमितिका अध्यक्ष शिवप्रसाद ढकालको अध्यक्षतामा सम्पन्न भएको थियो ।

कार्यक्रममा कर्मचारी सञ्चय कोष भवन ईकाइका सब–ईञ्जिनियर अम्बिका केसी, राष्ट्रिय व्यापार महासंघका सदस्य विनय अग्रवालको विशेष आतिथ्यसहित काठमाडौं मलका २ सयभन्दा धेरै व्यापारीहरूको उपस्थिति रहेको थियो ।

नयाँ कार्यसमितिले काठमाडौं मलका व्यापारी र कर्मचारी सञ्चय कोषको हकहितमा काम गर्नेछ । सञ्चय कोषले व्यापारीहरूको हकहितमा सहकार्य गर्ने आश्वासन दिएको छ । व्यापारीले समयमा घरभाडा तिर्ने, पानी, बत्ती, सरसफाई बापतको रकम समयमा कर्मचारी कोषलाई उपलब्ध गराउने बारेमा नयाँ कार्यसमितिले विशेष ध्यान दिने भएको छ । व्यापारीहरूको हक अधिकारका विषयमा विशेष ध्यान दिन सञ्चय कोषलाई आग्रह गर्नेदेखि भाडा समयमा उपलब्ध गराएर व्यापारीहरूले पनि सहयोग गर्ने कार्यक्रमका वक्ताहरूले विशेष जोड दिएको जानकारी दिइएको छ ।

कर्मचारी सञ्चय कोषसँग व्यापारीहरूलाई नहटाउन पनि नयाँ कार्यसमितिले आग्रह गर्दै लिफ्ट र शौचालयहरूको शीघ्र जिर्णोद्धार गर्ने बारेमा पनि वक्ताहरूले विशेष जोड दिएका छन् । काठमाडौं मलको लिफ्ट नयाँ फेर्नका निम्ती टेण्डर आह्वान भइसकेको छ । टेण्डर सम्झौता भए बमोजिम ९२ दिनभित्र नयाँ लिफ्ट चल्ने जानकारी कार्यक्रममा दिइएको छ । कार्यक्रममा स्काईलेटर सञ्चालनको निम्ति टेण्डरमार्फत वार्षिक मर्मत गराउने आश्वासन र विश्वस्त बनाइएको छ ।

पुसबाट व्यवस्थापन सम्हालेका कर्मचारी सञ्चय कोष ईकाइले व्यापारीलाई सहज रुपमा घरभाडा, बत्ती, पानी, सरसफाई, सेक्यूरिटीको राम्रो व्यवस्थापन गर्न सफल रहेको भन्दै कोषका सुन्धारा ईकाइ प्रमुख केशव आचार्यलाई विशेष धन्यावाद समेत दिइएको छ ।