सप्तकोसीमा पानीको सतहले सतर्कता तह नाघ्यो,धनुषा,सिराहाका नागरिकलाई सुरक्षित स्थानमा जान उर्दी

काठमाडौं-अविरल बर्षाका कारण सप्तकोसी नदीको चतरा क्षेत्रमा पानीको सतहले सतर्कता तह नाघेको छ | शनिबार बिहान बिहान ६ बजे जलसतहले सतर्कता तह पार गरेको हो |
लगातार भएको वर्षाले पानीको बहाव अझै बढ्दो क्रममा रहेको छ |
सतर्कता तह नाघेर अझै पानीको बहाब बढेपछि सरकारले सुनसरी र सप्तरी जिल्लाका नदीतटीय क्षेत्रमा बसोबास गरिरहेकालाई आज बेलुकी सम्मै उच्च सतर्कता अपनाउन अनुरोध गरेको छ |
त्यस्तै कमला नदीमा आएको बाढीका कारण धनुषामा तितरिया बाढीमापन केन्द्रमा जलसतह खतरा तह भन्दा ज्यादै माथि पुगेको छ |
वर्षा हुने क्रम जारी रहने देखिएकोले धनुषा,सिराहा जिल्लाको डुबान भईरहने तटीय क्षेत्रमा बसोबास गरिरहेका नागरिकलाई दिनभर सुरक्षित स्थानमा जान र रहन बाढी पूर्वानुमान शाखाले अनुरोध गरेको छ |