क्लिन फिडको व्यवस्था हटाउन सकिन्न : संचारमन्त्री बाँस्कोटा

काठमाडौं- संचार तथा  सूचना प्रविधिमन्त्री गोकुलप्रसाद बाँस्कोटाले क्लिन फिडको व्यवस्था हटाउन नसकिने बताएका छन्। संसद्‌को सूचना तथा प्रविधि समितिमा भएको छलफलमा मन्त्री बाँस्कोटाले  यस्तो बताएका हुन्। 

राष्ट्रियसभामा दर्ता भएको ‘विज्ञापन नियमन गर्ने सम्बन्धमा व्यवस्था गर्न बनेको विधेयक’को दफा ६ (१)मा नेपालमा प्रसारण हुने विदेशी टेलिभिजन च्यानल विज्ञापनरहित (क्लिन फिड) हुनुपर्ने व्यवस्था छ।

विधेयकको यो व्यवस्थामा सांसदहरु लक्ष्मणलाल कर्ण र एकवाल मियाँले संशोधन प्रस्ताव राखेका छन्। उनीहरुले क्लिन फिड शब्द हटाउनुपर्ने प्रस्ताव गरेका थिए।

‘क्लिनफिड नै हटाउनुपर्छ, लागू गर्नहुन्न भनेर आएको छ। यस्तो संशोधन ल्याउनु अधिकार हो, ठीकै छ। तर सरकारले यो कुरा मान्नै सक्दैन। कानुनलाई नै खोस्टोमा बदल्ने कुरा गर्न सकिँदैन,’ बाँस्कोटाले भने।

उनले संशोधनकर्तालाई राष्ट्रिय भावना बुझेर संशोधन फिर्ता लिन आग्रह गरेका थिए।