पहिरोका कारण गुल्मीमा १० को मृत्यु, २ जना बेपत्ता

गुल्मी– सोमबार साँझदेख परेको अविरल वर्षाका कारण गुल्मीमा १० जनाको मृत्यु भएको छ भने २ जना बेपत्ता भएका छन्। गुल्मीको सत्यवती गाउँपालिकामा पहिरोका कारण मृत्यु हुनेको संख्या १० पुगेको हो।

गाउँपालिकाको वडा नम्बर ३ भल पस्दा स्थानीय टेकबहादुर तरामूकी ३० वर्षीया श्रीमती तिलकुमारी तरामू, उनका १० वर्षीय छोरा दर्शन तरामूको मृत्यु भएको छ। सोही घटनामा तरामूका २ छोरी घाइते छन् ।

यसैगरी सत्यवती गाउँपालिका वडा नम्बर ४ मा पहिरोले घर बगाउँदा ८ जनाको शव फेला परेको वडा कार्यालयले जनाएको छ। मृत्यु हुनेहरुमा एकै घरका ६५ वर्षीय छल्ली बिक, २८ वर्षीय पम्फा बिक, १२ वर्षीय अंजली बिक, १० वर्षीय हेमन्त बिक, रुपा बिक, सिवानी बिक, निर्मला बिक, हिमान्सु बिक रहेका छन् ।

सोही गाउँपालिका वडा नम्बर ३ का रुद्र बिकको घर पनि पहिरोले बगाएको छ । पहिरोले घर बगाउँदा ४० वर्षीय मायाँ बिक र १६ वर्षीय गबि बिक बेपत्ता भएका छन् ।
उद्धारका लागि प्रहरी खटिएको जिल्ला प्रहरी कार्यालयले जानकारी दिएको छ।