पूर्व मिस नेपाल मलिना जोशीकाे यस वर्ष विवाह नहुने

काठमाडाैं-पूर्व मिस नेपाल तथा अभिनेत्री मलिना जोशीकाे यस वर्ष विवाह नहुने भएकाे छ । बिहीबार ऋचाको रिसेप्सन पार्टीमा पुगेकी उनले आफुलाई जाडो महिना मन नपर्ने भएकाले मंसिरमा विवाह नगरेको बताइन् । अभिनेता अनुप विक्रम शाहीसँग ब्रेकअप भएपछि अहिले उनी सुशान्त प्रधानको प्रेममा रमाइरहेकी छिन् । 

विवाह कहिले गर्ने तयारी छ ? भन्ने पत्रकारको प्रश्नमा उनले भनिन्, ‘मलाई जाडो मन पर्दैन । त्यसैले जाडो महिनामा बिहे नगर्ने निर्णय लिएको हुँ । अहिले मलाई धेरैले विवाह कहिले गर्छौं भनेर सोधिरहेका छन् । सम्भवतः यो वर्ष हुँदैन । अर्को वर्षको बैशाख र जेठभित्र हुनसक्छ । तर, अहिले नै कुनै निश्चित भने भैसकेको छैन ।’ तर, आफू विवाहको तयारीमा भने रहेको उनले बताइन् । 

सन् २०११ मा मिस नेपाल बनेकी मलिनाले फिल्म ‘ऋतु’ बाट अभिनयमा डेब्यू गरेकी थिइन् । तर, उनको फिल्मी करिअर खासै सुखद हुन सकेको छैन । उनी अभिनीत सबै फिल्म बक्सअफिसमा नराम्रोसँग चिप्लिएका छन् । फिल्मभन्दा प्रेम सम्बन्धका कारण बढी चर्चामा रहने उनी प्रेमी सुशान्तसँग रमाएका तस्विरहरु सामाजिक सञ्जालमा प्रायः दैनिक पोस्ट्याउने गर्दछिन् ।