दक्षिण कोरियाका सिनेमा हलमा टिकटको मूल्य वृद्धि

सोल- दक्षिण कोरियाको सबैभन्दा ठूलो चलचित्र सञ्जाल सीजीभीले हलमा सिनेमा हेर्न लाग्ने टिकट शुल्कमा बृद्धि गर्ने भएको छ । कोरोना संक्रमणबाट थलिएको चलचित्र उद्योगलाई उकास्न आगामी २६ अक्टोबरबाट उक्त नयाँ शुल्क लागु गरिने भएको सीजीभीले बताएको छ ।

अब चलचित्र हेर्न जाने दर्शकहरुले १ बजे अगाडीका शोका लागि १२०० वोन तथा १ बजे पछिका शोका लागि १३०० वोन तिर्नुपर्ने भएको छ । त्यस्तै गरि पर्दाबाट सीटको दुरीका आधारमा कायम गरिएको टिकट मुल्य समेत खारेज गरिने सीजीभीले बताएको छ ।

यस अघि इकोनोमी, स्ट्यान्डर्ड तथा प्राईम गरि हलका सिटहरु तीन तहमा बिभाजन गरिएका थिए जहाँ प्राईम सिटका लागि दर्शकले २००० वोन तिर्नु पर्दथ्यो । अब फोरडीएक्स तथा आइम्याक्स Iप्रणालीका हलहरुमा भने थप १ हजार वोन तिर्नु पर्ने छ ।

सिनेमा टिकटको मुल्य बढाउनु अपरिहार्य आवश्यकता रहेको चलचित्र वितरक सीजीभीले बताएको छ । कोरोनाका कारण लामो समयसम्म हलहरु बन्द भएको, भाडा तिर्न समस्या भएको, कर्मचारीको तलव सुविधा ब्यवस्थापनमा समस्या भएको लगायतका कारण कुल्य बढाइएको सीजीभीले बताएको छ । हाल ७० प्रतिशत हलहरु बन्द रहेको समेत बताइएको छ ।