सुरेन्द्रको सुन्दर शब्दमा रविनको मखमली आवाज

सुरेन्द्र कार्की ‘अन्जान काइँला’ साहित्यलाई मिहिन ढंगले बुझने एक युवा साहित्यप्रेमी हुन् । दक्षिण कोरियामा रहेर पनि कामसंगै बचेखुचेका समयमा आफनो परिवार, देश सम्झेर शब्दको आगो ओकल्छन् । प्रवासमा रहेर पनि उनको नेपाली साहित्यप्रतिको लगाव र योगदानलाई खुलेरै प्रशंसा गर्नुपर्ने हुन्छ । नेपाली साहित्य समाजमा सचिव जस्तो जिम्मेवार पदमा रहँदाको उनको जोश,जाँगरको प्रतिफलको रुपमा लिन सकिन्छ सांगीतिक यात्राको फल ‘सहयात्रा’ ।

यसै एल्बममा समेटिएको एउटा गीतको २ हप्ता अघि म्युजिक भिडियो रेगम म्युजिक हवबाट सार्वजनिक भएको छ । हुन त नेपाल आएर एकपछि अर्का सुमुधुर गीतको म्युजिक भिडियो सार्वजनिक गरेका संगीतको उदाउँदो मखमली आवाज भएका रविन रेगमले सुरेन्द्र कार्कीको शब्दलाई जीवन्त बनाएका छन् । यही क्षेत्रमा आफनो भविष्य खोजीरहेका रेगमको मिठो आवाजले जो कोहीको मन चोर्न सक्छ ।

“दिने थिए तिमीलाई” गीतमा नवराज सिं खडका र दिपिका भट्टराईको अभिनय देख्न सकिन्छ । गायक रेगमको संगीतलाई गोपाल रसाइलीले संगीत संयोजन गरेका छन् । हरि वाग्लेको निर्देशन र सम्पादन हेमन तामाङ्गले गरेका छन् ।
भिडियो छायाँकन सुमन तामाङ्गले गरेको यो गीत कोरियामा रेकर्ड गराइएको हो । नेपाली संगीतमा ‘दिने थिए तिमीलाई’ गीतले सांगीतिक क्षेत्रमा एउटा नयाँ इँटा थप्ने काम गरेको छ ।