सन् २०४० सम्ममा दक्षिण कोरियाली नागरिकको औसत आयू ८५.५ हुने

सोल –  आर्थिक सहकार्य र बिकास नामक अन्तराष्ट्रिय संस्थाले हालै गरेको एक सर्वेक्षण अनुसार दक्षिण कोरियाली नागरिकहरुको औसत आयु सन् २०४० सम्ममा  ८५.५ बर्ष पुग्ने छ । उक्त संस्थाका ३७ वटा सदस्य राष्ट्रहरुमा गरिएको नवजात शिशुहरुको औषत आयु सम्बन्धि सर्वेक्षणका क्रममा दक्षिण कोरिया उत्कृष्ठ १० मा परेको समेत संस्थाको प्रतिवेदनमा उल्लेख छ ।

पेरिसमा मुख्य कार्यालय रहेको उक्त संस्नाले गरेको अध्ययन अनुसार यदि मृत्युदर परिवर्तन नभएमा हाल जन्मिएका शिशुहरुको औसत आयु ८२.७ बर्ष पुग्ने समेत बताएको छ ।

यता दक्षिण कोरियाले भने सन् १९७०-८० को तुलनामा औषत आयु केही बढेता पनि छिमेकी मुलुक जापान तथा अन्य विकसित मुलुकमा जस्तो ब्यापक रुपमा भने नबढेको बताएको छ ।

हाल उक्त सुचीको पहिलो नम्बरमा  औसत आयु ८४.२ बर्ष सहित जापान रहेको छ । दोश्रो नम्बरमा ८३.९ सहित स्विजरल्याण्ड रहेको छ भने तेश्रोमा स्पेन रहेको छ । चौथो स्थानमा इटाली, पाँचौमा आइस्ल्याण्ड, छैटौँमा इजरायल, सातौँमा फ्रान्स, आठौँमा अष्ट्रेलीया तथा नवौँ स्थानमा नर्वे रहेका छन् ।

उक्त अध्ययनले सन् २०४०  सम्ममा दक्षिण कोरिया औषत आयु ८५.५ बर्ष सहित सुचीको सातौँ स्थानमा उक्लिने समेत प्रक्षेप्पण गरेको छ ।