काठमाडौंमा भेरोसेलको पहिलो मात्रा लगाउनेको संख्या १,४८,३३४ मात्र

काठमाडौँ- काठमाडौं जिल्लामा पछिल्लोपटक सरकारले सञ्चालन गरेको कोरोनाविरुद्भको खोप अभियानअन्तर्गत एक लाख ४८ हजार ३३४ जनाले भेरोसेल खोपको पहिलो मात्रा लगाएका छन् ।

स्वास्थ्य कार्यालय काठमाडौंका प्रमुख बद्रीबहादुर खड्काले गत असार २९ देखि साउन १ सम्म उक्त संख्यामा भेरोसेलको पहिलो मात्रा लगाइएको जानकारी दिएका छन् । शुक्रबार मात्रै ३२ हजार २५५ जनाले खोप लगाएका छन् । त्यसो त मौज्दात खोप अभाव भएको भन्दै स्वास्थ्य कार्यालयले शुक्रबार दिउँसोदेखि नै अभियान स्थगित गरेको छ । असार ३१ मा ५८ हजार ६२०, असार ३० मा ४३ हजार ३३४ जना र असार २९ मा १३ हजार ६६३ जनाले खोप लगाएको कार्यालयले जनाएको छ ।

पछिल्ला दिनमा जिल्लाले ५० वटा खोप केन्द्र सञ्चालनमा ल्याएको थियो । यसपटक ५५ वर्षमाथिका सबै नागरिक, शिक्षक, प्राध्यापक, कर्मचारी, सवारी चालक, सहचालक लगायतका पेशामा आवद्धलाई खोपको प्राथमिकतामा राखिएको थियो । स्वास्थ्य सेवा विभागले काठमाडौंलाई १ लाख ५७ हजार ४०० डोज खोप उपलव्ध गराएको थियो।